Lebona Lephema o reka linoko tse 70 lekholong tsa Morafo oa Mothae ka M120,000

Lephema Executive Transport e rekile linoko tse mashome a supileng lekholong (70%) tsa morafo oa Mothae ka chelete e hakanyetsoang ho lekholo le mashome a mabeli la likete tsa Maloti (M 120,000) eleng litolara tsa Australia tse likete li leshome (A$ 10,000), ho rialo phatlalatso e entsoeng ke Mothae ka Labobeli la beke ena. Khoebo ea Letona la Sepolesa, Tsa Lehae, Borena le Puso ea Libaka, Lebona Lephema, e rekile karolo e neng e le matsohong a Lucapa Diamond Mining ea Australia. Tumellano ea thekiso e re morafo oa Mothae o tla lefa limilione tse leshome le metso e 'meli tsa Maloti (M12million), ho Lucapa. Lephema Executive Transport e lebeletsoe ho jara mekoloto eohle ea Lucapa le ho ananela litumellano tsee e neng e le kahar'a tsona. Potso ea karolo e 'ngoe ea sechaba litabeng tsena, ke hore na theko ea morafo oa Mothae ke khoebo ea Letona, e fapana ho kae le thekisetso ea thepa ea Matekane Mining Investment Company (MMIC) ho morafo oa Lets'eng, ka le reng mong’a eona, Ntsokoane Matekane ke Tonakholo ebile ke mopolotiki.