MOCHOCHISI O RE NAEPENE EO MO-ETHIOPIA A E LEFILENG MOLLI OA PETO E OELELLETSE, O LOKELA HO QOSOA

Mochochisi oa mehleng Qinimuzi Tshabalala, o re ’muso o tlameha ho qosa Mo-itopia ka nyeoe ea peto ea mosali oa Mokhotlong ea sebetsang Polihali ho sa natse mats’eliso a naepene e fuoeng molli lekhotleng la Morena Masiphola Sekonyela, ka mor’a ho phekholoa khotla ke Mochochisi, a re bobeli bo il’o buisana. A bua lenaneong la Khotla ka Lapele la beke ena, o itse linyeoe tsa mofuta ona ke tsa Motlotlehi, mosali ea reng o apotsoe likobo ka sheshe ha a na matla holim’a eona, e se e le paki ea ’muso ho hlalosa se etsahetseng. A re molli o tla itseka ka mor’a hore ’muso o phethele nyeoe ea oona, ka lebaka leo, nyeoe ena e tlameha ho fuoa mochochisi e mong a kene khotla taba li fele. Tshabalala o itse lebili la toka le fa makhotla a bo-’Maseterata matla a ho mamela linyeoe, ’me likahlolo tsa lona li boima hoo moqosuoa a ka ahloloang lilemo-lemo chankaneng a sa itefelle e-bang a fumanoa a le molato, a ba a re mochochisi ea phahlileng nyeoe khotla le eena o entse phoso e kholo, empa a ke ke a re ke tlolo ea molao. Tabeng ea likete tse mashome a mane tsa Maloti Moitopia tse lefeloeng mosali o itse li oelelletse.