Basebeletsi ba tsa Bophelo libakeng tse fihlellehang ka thata, ba khutliselitse mohoma temeng, ba re ba amohela makholo a mahlano a maloti

Boemeli ba basebeletsi ba tsa Bophelo libakeng tse fihlellehang ka thata Qachaseneke, Thaba-Tseka le Mokhotlong, ba re ba amohela makholo a mahlano a Maloti, ao ’muso oa Lesotho o reng o ka atleha ho ba lefa oona khoeli le khoeli, ’me ba khutletse ts’ebetsong. Monghali Tanki Malau Ranthimo, o re sena se tla ka mor’a hore makala a amehang le balli, a khokhohanye puo ntlokholo ea Lekala la Bophelo ka Labone la beke ena, moo ’muso o reng ho latela likhakanyo tsa lichelete tse mangoleng, o ka atleha ho ba lefa naepene e boletsoeng, ee tebello e leng hore e tle e nyolloe ka mekhahlelo. O re lekala la bophelo le re ebang le ka la ba lefa sekete sa Maloti khoeli le khoeli, chelete eo e tlil’o fella khoeling ea borobeli selemong sena, ebe ke phetho ke tuu, ho latela lichelete tseo le li abetsoeng. O re ts’episo ke hore ha khoeli ena e kolumela, ba tla fumana meropotso ea bona, ’me ba qalile ho sebetsa ho tloha ka Labone la beke ena. Litaba tsena li tla ka mor’a hore lingaka, baoki le bafani ba litlhare litsing tsa bophelo tsa litereke tse boletsoeng, ba kene boipelaetsong bo neng bo se bo haba khoeli, ba re ’muso o ba lefe likete tse hlano tsa Maloti, empa oa re o na le sekete ho fihlella o se o re ho latela mokotla o masoba oa ’muso, o ka ba lefa makholo a mahlano.