LIPOLAO TSE SEHLOHO LI APARETSE NAHA EA MOSHOESHOE

Liketso tse khopo tsa bosatane tse aparetseng naha ea Moshoeshoe li se li hloka baruti ho thusetsa ka lithapelo ho sokolla sechaba, ‘muso o phutla ka mokotla o metsi ka sechaba se shoeleng letsoalo, se tsohelana matla se rinyana ka sehloho sa linta tsa letaa-ta ho se qenehelano. Phutsalatso ena e amohetse tlaleho ea lelapa la ‘Mota le Berea Ha ‘Mamathe Moreneng le bolaetsoeng mora oa lona ka sehloho sa liretlo, eo setopo sa hae se fumanoeng lilomong tsa Ha Leneha ka Labots’elela la beke e fetileng, se khaotsoe qoqotho, se khaotsoe leleme se bile se se na linko. Mofu o tlalehoa ke rangana’e Thabo ’Mota a qetetsoe ho bonoa ka Labohlano la beke eo, a fumanoa ka le hlahlamang, e se ele maobane. ’Mota o re ‘melaelloa ha a e-so tsejoe ketsahalong eo, empa lelapa le belaela mofu a akhetsoe selomong moo ka sepheo sa ho patoa, a se hlahelle. Tlaleho ena e tla matsatsana feela ho bile le ketsahalo ea ho epolloa ha monna oa Liphookoaneng, Khotsis, Ha-Rajone, Berea ea fumanoeng a nyeunya liboko ho o mong oa metse ea Maseru ka morao ho nyamella lelapa likhoeli tse tharo.