Morena o litlamong tsa sepolesa ka pelaello ea bosholu ba nku, Mokhotlong

Morena oa Khotsang le Bahaoleng, Mokhotlong, o litlamong tsa sepolesa ka pelaello ea bosholu ba nku ea e mong oa baahi ba motse oa Khotsang, ’me ka ha hae, ho fumanoe letlalo le nama ea eona, ka Labone la beke ena. ’Maseeiso Nkhaoli, o re ha ho fumanoa nama eo, morena o itse likahare o ile a li lahlela ka ntloaneng, ha hlooho ea eona a ile a e tjebela kantle ka fensetere ha ho se ho kenoa ntlo le ntlo, ho batloa phoofolo eo. O re o belaela morena le ba neng ba e-na le morena, ba entse sena e le ha ba nka monyetla oa hore molekane oa hae ha a utloe litsebeng, ’me litaba tsena li nyarositse baahi ba motse oo hobane ts’epo ea bona e le ho morena.