Nkhono o re a ka mpa a shoa ho ena le ho boela sepoleseng sa Ha Mofoka

Moahi oa Koro-Koro Ha Mohlakaso, Maseru, o re ho molemo ho shoa ho e-na le hore a khutlele sepoleseng sa Ha-Mofoka, ka mor’a hore se mo hlokofatse ka le reng a nts’e sethunya sa mocheliete ea hlokahetseng libekeng tsa ho feta. ’Matumelo Kabeli o re o hlokofalitsoe ho tloha ka Labone la beke e fetileng, ho fihlela ka Labots’elela la eona, ha a lokolloa a laeloa hore a itlalehe sepoleseng ka Lapele la beke ena, ka le reng a ee le sethunya seo a boletseng ka makhetlo hore ha a se tsebe, ebang a sa etse joalo, a tsebe hore tlhokofatso e tlo menahangoa. O re nakong eo a leng mapoleseng, o ile a paqamisoa fats’e, a tlamelloa matsoho ka morao, eare ha lihanaboi li mo kena, a kopa ho ea ntloaneng, ’me ho khutleng teng a emelloa ka hore a nts’e sethunya. ’Matumelo ea lilemo li mashome a ts’eletseng a metso e mehlano, o re sethunya sena seo a se batloang ke sa mocheliete oa hae o ileng oa hlokahala o kula, joale a ntse a ea ho o hloela, ho o bileng oa mo nea linotlolo tsa ona hore a tle a li fe ba ts’oanetseng, pele a ka timela.