Morena o re sepolesa sa Mants’onyane se sireletsa lesholu la liphoofolo, Thaba-Tseka

Morena oa Lihloaeleng Ha-’Muso, Thaba-Tseka, o re sepolesa sa Mants’onyane ha sea ikemisetsa ho sebeletsa motse oa hae ka monna ea khathalitseng sechaba sa hae ka bosholu ba liphoofolo, se atisa ho mo sireletsa ka mabaka a sa tsejoeng. Morena Chabeli ’Muso, o re o bua tjena ka mor’a hore sepolesa se boletsoeng se mo letsetse hore monna eo o thobile litlamong tsa sona, ka Labobeli la beke ena, ka mor’a hore se laele morena ho mo isa ho sona ka la maobane, a belaelloa ka ho hlatsoa babeisi. O re eena le mahokela a habo, ba ile ba felehetsa ’melaelloa ho ea sepoleseng, e leng moo a tlalehiloeng a thobile litlamong tsa sona, ’me sechaba se nyahame ha se lokela ho thusa sepolesa ho mo batla.