Ngoanana ea rekisang lifannora ka har’a toropo ea Maseru, o re o betuoe ke monna ea neng a ikhakantse sa mokana e le moreki

Ngoanana oa o mong ea metse ea Maseru, ea lilemo li leshome le metso e robeli, ea rekisang lifannora ka har’a toropo ea Maseru, o re o betuoe ke monna ea neng a ikhakantse sa mokana e le moreki, ka mor’a ho kopana le eena selikalikoeng se seholo sa makoloi sa Maseru, hoseng ha Labohlano la beke ena. O re monna eo, o ne a ile a mo ferehela ho tsamaea le eena ho ea rekisetsa basebetsi-’moho le eena kaholim’a thaba ea Mpilo, ka le reng morekisi oa bona oa kamehla ha a theohela letsatsing leo, ke ha a tla mo latela, athe o tla mo tsohela matla ha ba le tseleng, a bile a mo apola likobo ka sheshe le ho utsoa mohala oa hae oa letsoho. O re monna eo, o ne a roetse katiba ea thola-moea e ts’oeu e metsero e mesootho, a roetse katiba e ’ngoe e tala ka hare, a apere lamba e meroni, borikhoe bo bothokoa, a jarile mokotla o ts’etseng kobo ea mots’ehare e tsehla, ’me o ne a ile a ipolela e le molebeli sebakeng se joalo, o se a butse nyeoe sepoleseng.