Lioli FC e hahara sohle likhaung tsa liki e kholo

Libapali tsa sehlopha sa Lioli le mokoetlisi oa sona, li fumane likhau le naepene tse pakahatsang boipabolo ba sehlopha se hapileng liki e kholo ea futubolo selemong se fetileng, moketjaneng oa mantsibuea o bileng ho e 'ngoe ea matlo a phomolo Maseru, ka Labohlano la beke ena. Monghali Motheo "six-to-six" Mohapi oa Lioli FC ke mokoetlisi oa selemo, libapali tsa hae tse hlotseng ke William Huni, sethibathibane sa sehlopha, Mafa Moremoholo ea bapalang morao le Jerry Kamela ea li sokang bohareng ba lebala. Kamela o bile a fumana khau e kholohali, ea ho ba sebapali sa selemo. Sebapali se khethiloeng ke tse ling, ebile se korile ho li feta, ke Lemohang Lints'a oa Limkokwing FC, ka likoulu tse 18. Katleho Koeana o hapile khau ea ho ba lekejakejane la selemo. Thabelo Ntaote ke mothusi oa moletsa-phala oa selemo, ha moletsa-phala ea ipabotseng e le Samson Molelekoa.