MOLELEKI O RE MOAFRIKA FM E LOKELOA KE KHAU EA MOHLOMI

Moetellipele oa Alliance of Democrats, monghali Monyane Moleleki o re Phutsalatso ea MOAFRIKA ka mothehi oa eona, e lokeloa ke khau ea Mohlomi. Sefate se molemo sa ka Machache se re Phutsalatso ea Molimo e ipabotse bosebeletsing ba sechaba, haholo-holo ka tšebeletso ea mokhosi le thuto ea likhetho ee qhooa ena e fanang ka eona ka lenaneo la Pusong ea Sechaba ka Sechaba. A bua lenaneong le tšoanang ka Labotšelea la beke ena, mokhethoa oa Machache o itse lekhotla la habo le malala a laotsoe ho kena pusong. O tsoetsepele hore maputulo a litho tsa Maholosiane pusong ea lephele, a shejoe makaleng a thuto, lipapali le matla, moo ba ahileng likolo, ho tsosolosa morolo oa lipapali bacheng le ho thakhola litsi tsa phehlo ea motlakase oa letsatsi le moea. Moleleki o thatisellelitse litaba tsa hae ka ho iphatlalatsa hore selemong sena o tla emela likhetho lebatooeng la Thaba Boisu. Sena se tla kamora hore a iphatlalatse a se a sena morero oa ho emela likhetho ka mongoaha oa likete tse peli leshome le metso e supileng. Ho le joalo, moetellipele oa bohanyetsi lekhotleng la sechaba o itse phetoho ea molao oa likhetho e reng mabitso a Khekhethane a se hlole a isoa pele ho likhetho ke eona e qobelletseng komiti ea AD ho molaela hore a boele a emele likhetho tsa mabatooa, hoja a ne a sena morero oa ho etsa joalo.