MOPARAMENTE O ARABELA SELLO SA SECHABA SA MOTETE HA LEQABANYO, MOKHOTLONG

Moparamente oa Malingoaneng, monghali Sehloho Monatsi, ka Labohlano la beke ena, o arabetse kopo ea sechaba sa Motete, Ha Leqabanyo, o se file thepa e tla sebelisoa ho thibela khoholeho ea mobu. Monghali Monatsi o bile a se hirela koloi e thothang majoe a tla koala khohloana e neng e le mothating oa ho nka mabitla a sebakeng seo, le hore ho na le mokonteraka ea tla etsa mosebetsi oo sechaba se neng se ikemiselitse ho o etsa. Puisanong le mofuputsi oa litaba habo Liphamola, monghali Mohlalefi Kokoropo, o re ho latela pula e neleng hampe mathoasong a selemo sena, ho ile ha fateha mangope hoo litopo li neng li le mothating oa ho theosa le khohloana eo. Monghali Remaketse Mokhupi lebitsong la morena oa sebaka seo, o itse o lebohela sechaba seo sa hae, a re h’a ome mathe ha a bua ka lintle tsee monghali Monatsi a li etselitseng sechaba sa moo, tse akhang likolo, litsela le ho lefella ba eang likolong tsa litsebo tse fapakaneng. Ho sale joalo hona ka Labohlano leo, monghali Monatsi o boetse a nanabetsa letsoho ho sechaba, ka ho se hirela mochine o lokisang tsela e eang sekiring sa masoleng, ee ho neng ho le thata hore likoloi li fihle sebakeng seo ho ea nka boea ba lihoai bo isoa mabopong.